Es dins un tristum bèl que lo Centre de Formacion Professionala Occitan fa part de la mòrt de Teiric Soulé, sòci de son Conselh d’Administracion.
Teiric èra afogat del patrimòni cultural occitan, estacat a la practica de la lenga occitana qu’aimava. Es dins l’amira de la transmission de l’occitan que Teiric Soulé fondèt l’associacion culturala Tu Tanben. Dins un esperit cooperatiu e de convergéncia amb los partenaris occitans besierencs, obrava sens relambi a la creacion de novèlas aisinas e d’activitats plan divèrsas coma de cantèras, de cine-òc, d’aperitius occitans, de talhièrs de dança, de conferéncias e talhièrs. Amb estrambòrd e energia gaujosa, creèt la jornada occitana de Bojan, son vilatge, que ne coneissiá l’istòria e qu’i voliá far renàisser tot l’eime occitan.
Òme de còr e d’engatjament fisèl, nos mancaràs !
