La formacion continua
Dempuèi 1997, lo Centre de Formacion Professionala Occitan s’encarga de la formacion continua dels Ensenhaires de las Escòlas immersivas Bressola, Calandreta, Diwan, Seaska e Zweisprachigkeit. Lo Centre de Formacion Professionala Occitan (C.F.P.O), a la seguida d’una demanda de la Confederacion Occitana de las escòlas Calandretas e, d’acòrdi amb las federacions d’escòlas Bressola pel catalan, Diwan pel breton, Seaska pel bàscol e Zweisprachigkeit per l’alsacian, es estat cargat de la formacion professionala continua dels ensenhaires dels establiments en contracte d’associacion amb l’Estat de totas las federacions aquelas.
Las accions de formacion continua porgidas pels ensenhaires se debanan en tot se conformar amb las disposicions de la convencion ministeriala del 20 de març de 1997 emai las del libre IX del còde del trabalh.
Per complir aquela mission, lo C.F.P.O òbra en ligam amb las inspeccions d’Acadèmia de cada departament pertocat per d’establiments de las federacions susdichas, en concertacion amb los rectorats e sota la tutela administrativa e financièra del ministèri de l’Educacion Nacionala francesa. A respècte de la lenga occitana e las escòlas Calandretas particularement, lo C.F.P.O fa en acòrdi amb e jos l’autoritat de la Confederacion. Es partenari de las federacions regionalas de las escòlas Calandretas, s’apièja suls paissèls ajudaires de l’establiment d’ensenhament superior APRENE e consulta los delegats dels regents a prepaus dels projèctes de formacion continua. Lo Conselh d’Administracion decidiguèt que caliá decentralizar la formacion continua dels regents de las escòlas Calandretas e sollicitèt de longa l’iniciativa lora demercé lo biais sonat « de regents referents per cada accion ».
Per cada federacions d’escòla en immersion que posa al C.F.P.O per la formacion continua, lo calendièr annal de las accions de formacion s’a de detalhar amb las datas los oraris, los tèmas, l’objectiu de cada accion, lo nombre de participants, los noms amb la qualitat de cada interveneire, lo mòde d’avaloracion de l’objectiu de la formacion prepausada, las seguidas o los complements eventuals. D’autra part, un budget per cada accion e un budget annal son annexats. Aqueste calendièr annal previsional budgetizat s’a de donar al C.F.P.O a la premièra quinzenada del mes de mai, cad’an, per una mesa en òbra que comença al mes de setembre seguent.
Cada annada al mes de decembre, las federacions d’escòlas en immersion comunican al C.F.P.O lo bilanç certificat de las accions menadas amb un compte de resultat e un rapòrt pedagogic que marca tant lo nombre d’oras de formacion continua coma lo nombre d’estagiaris per accion, e al total, quitament.
Lo C.F.P.O es Centre agregat pel ministèri de l’Educacion Nacionala francesa e recep lo finançament de la formacion continua per totas las escòlas immersivas en lengas non oficialas de França a proporcion del nombre total d’ensenhaires pagats per l’Estat.
